१४ वैशाख,काठमाडौँ । निर्वाचन आयोगको आज बैशाख १४ गते शुक्रवार बसेको बैठकले प्रतिनिधि सभा तथा प्रदेश सभा सदस्य उपनिर्वाचन २०८१ वैशाख १५ गतेको सवारी आवागमन व्यवस्थापन गर्न गृह मन्त्रालय मार्फत सम्बन्धित जिल्लाका प्रमुख जिल्ला अधिकारीलाई निर्देशन दिएको छ । इलाम जिल्ला प्रतिनिधिसभा निर्वाचन क्षेत्र नं.२ र बझाङ जिल्ला प्रदेश सभा निर्वाचन क्षेत्र नं. १(१) मा सम्पन्न हुने उपनिर्वाचनमा स्वच्छता, निष्पक्षता तथा पारदर्शितामा असर नपर्ने गरी सम्बन्धित निर्वाचन क्षेत्रका मतदाताहरूको सहज आवागमनका लागि आयोगको वैशाख १० गतेको निर्णयबाट सार्वजनिक यातायात सञ्चालनको उपयुक्त प्रबन्ध गर्न निर्देशन दिइसकिएको थियो।

उपर्युक्त निर्देशन समेतका आधारमा मतदानको दिन वैशाख १५ गते शनिवारका दिन सवारी साधन सञ्चालन गर्न सम्बन्धित सबै सरोकारवालालाई आयोगका सहायक प्रवक्ता रामदत्त पाण्डेयले देहाय बमोजिम व्यवस्था गर्न भनेका छन् :

(१)  देहाय बमोजिमका सवारी साधन मतदाता ओसारपसार गर्ने कार्यमा प्रयोग नगर्ने गरी मतदानको दिन समेत निर्वाध रूपमा सञ्चालन गर्न दिने।

(क)  बिरामी बोकेको एम्बुलेन्स,

(ख)  खानेपानीको ट्याङ्कर,

(ग)  दुध बोक्ने सवारी साधन,

(घ)  दमकल,

(ङ) सूचना तथा प्रसारण विभाग वा प्रदेश सञ्चार रजिष्ट्रारको कार्यालय वा प्रदेश सरकार मातहतको सञ्चार प्राधिकरण वा अन्य त्यस्तै सूचिकृत भई सञ्चालनमा रहेका सम्बन्धित सञ्चारगृहबाट जारी गरिएका परिचयपत्र वाहक सञ्चारकर्मीले प्रयोग गर्ने सवारी साधन,

(च)  दुरसञ्चार तथा केवल सेवाका लागि प्रयोग हुने सवारी साधन,

(छ)  शव वाहन,

(ज) अस्पतालमा कार्यरत परिचयपत्र प्राप्त चिकित्सक, स्वास्थ्यकर्मी तथा कर्मचारीको आवागमनका लागि प्रयोग हुने सवारी साधन,

(झ)  निर्वाचन आयोगबाट जारी परिचयपत्र वाहक पर्यवेक्षक, अनुगमनकर्ताले प्रयोग गर्ने सवारी साधन,

(ञ)  फोहोर मैला ओसारपसार गर्ने सवारीसाधन,

(ट)   तरकारी, फलफुल तथा विद्युत सेवाका लागि प्रयोग हुने सवारी साधन,

(ठ)  कुटनीतिक नियोग, युएन एजेन्सी तथा द्विपक्षीय तथा वहुपक्षीय विकास साझेदार संस्थाहरूमा कार्यरत पदाधिकारी तथा कर्मचारीले प्रयोग गर्ने निलो नम्बर प्लेट भएको सवारी साधन,

(ड)   विदेशी पर्यटक मात्र बोकेको हरियो नम्बर प्लेट भएको सवारी साधन,

(ढ)  सुरक्षाकर्मीले प्रयोग गर्ने सुरक्षा निकायको सवारी साधन,

(ण) आफु खटिएको मतदान केन्द्रसम्म जान र मतदान केन्द्रबाट फर्किनको लागि मतदान कार्यमा खटिने कर्मचारी तथा स्वयंसेवकले प्रयोग गर्ने सवारी साधन ।

(२)  सम्बन्धित क्षेत्रका मतदातालाई मतदान केन्द्रसम्म सहज आवागमनको लागि आवश्यकता र औचित्य हेरी मतदानको दिन सार्वजनिक यातायातको उपयुक्त प्रबन्ध मिलाउने।

(३) उम्मेदवार वा निजको निर्वाचन प्रतिनिधि एक जनाले मतदानको दिन चार पाङ्ग्रे, तिन पाङ्ग्रे वा दुई पाङ्ग्रे मध्ये १ ९एक० वटा सवारीसाधन मात्र अनुमती लिएर प्रयोग गर्न सक्ने ब्यवस्था मिलाउने।

(४) सम्बन्धित जिल्लासँग जोडिएका राष्ट्रिय राजमार्ग र सहायक राजमार्गमा सार्वजनिक यातायातका साधनहरूको आवागमनको उपयुक्त व्यवस्था मिलाउने।

(५) मतदानको दिन कसैले यो निर्देशन विपरीत सवारी साधन प्रयोग गरेको पाइएमा सुरक्षा निकाय तथा सुरक्षाकर्मीले त्यस्तो सवारी साधन कब्जामा लिई मतदानको काम सम्पन्न भएपश्चात मात्र फिर्ता दिने व्यवस्था गर्ने।